މި ސްކީމަކީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާއި އިންޓަރނޭޝަނަލް ފަންޑް ފޯ އެގްރިކަލްޗަރަލް ޑިވެލޮޕްމަންޓް (އިފާޑް) ގުޅިގެން ހިންގާ 'މޯލްޑިވްސް އެގްރިބިޒްނަސް ޕްރޮގްރާމް (މެޕް)' ގެ ދަށުން އެސްއެމްއީ ޑިޖިޓަލް މެދުވެރިކޮށް ކުރިއަށްގެންދާ ޕްރޮގްރާމެކެވެ.

މި ޕްރޮގްރާމް އަމާޒުކޮށްފައިވަނީ މެޕް މަޝްރޫއު ކުރިއަށްދާ ހއ. އަތޮޅާއި، ހދ. އަތޮޅު އަދި ށ. އަތޮޅުގެ 26 ރަށެއްގެ ދަނޑުވެރިންނަށެވެ. މީގެ އިތުރުން މި ދާއިރާގައި ހަރަކާތްތެރިވާ ޖަމިއްޔާތަކާއި، ކުދި އަދި މެދުފަންތީގެ ވިޔަފާރިތަކުގެ އިތުރުން ކޯޕަރޭޓިވް ސޮސައިޓީތަކަށް ވެސް މި ފުރުސަތު ވަނީ ހުޅުވާލާފައެވެ.

ޝަރުތު ފުރިހަމަވާ ފަރާތްތަކަށް މުޅި މަޝްރޫއަށް ހިނގާ ޚަރަދުގެ 30 އިންސައްތައާއި 50 އިންސައްތައާ ދެމެދުގެ ނިސްބަތެއް ހިލޭ އެހީގެ ގޮތުގައި ލިބިގެންދާނެއެވެ. އަދި މި ސްކީމުގެ ދަށުން އެންމެ ގިނަވެގެން ދޫކުރުމަށް ހަމަޖެހިފައިވަނީ 150،000 ރުފިޔާއެވެ.

ގްރާންޓުގެ ދެވަނަ ބުރަށް ދަނޑުވެރިންގެ ފަރާތުން ބޮޑު ތަރުހީބެއް ލިބިފައިވާ ކަމަށް އެސްއެމްއީ ޑިޖިޓަލްއިން ފާހަގަކުރެއެވެ. އެގޮތުން މޫސުމަށް އަންނަ ބަދަލުތަކާ ގުޅޭ ޒަމާނީ ދަނޑުވެރިކަމާއި، އައު ގްރީންހައުސްތައް އެޅުމަށާއި ހައިޑްރޯޕޮނިކްސް ނިޒާމުތައް ގާއިމުކުރުމަށް ގިނަ ފަރާތްތަކަކުން ވަނީ ހުށަހަޅާފައެވެ.

މި ސްކީމާ ގުޅޭގޮތުން އެސްއެމްއީ ޑިޖިޓަލްގެ ސީއީއޯ ބަދުރުއްދީން ޙަސަން ވިދާޅުވީ، މިއީ މާލީ ބުރައެއް ނެތި ޒަމާނީ ދަނޑުވެރިކަމުގެ އައު އުކުޅުތައް ތަޖުރިބާކުރުމަށް ދަނޑުވެރިންނަށް ލިބުނު ފުރުސަތެއް ކަމަށެވެ. އަދި މިފަދަ އެހީތަކުގެ މައިގަނޑު މަގުސަދަކީ ރާއްޖޭގެ ދަނޑުވެރިކަމުގެ އުފެއްދުންތެރިކަން އިތުރުކޮށް، ދަނޑުވެރިންނަށް ލިބޭ އާމްދަނީ އާއި ނަފާ ފުޅާކުރުން ކަމަށްވެސް އޭނާ ވިދާޅުވިއެވެ.

މި ގްރާންޓާ ގުޅޭގޮތުން ހޭލުންތެރިކަން އިތުރުކުރުމަށް އެސްއެމްއީ ޑިޖިޓަލް އާއި ވުޒާރާ ގުޅިގެން ވަނީ އުތުރުގެ ތިން އަތޮޅުގެ ދަނޑުވެރިންނާ ބައްދަލުކޮށް މައުލޫމާތު ފޯރުކޮށްދީފައެވެ. މި ބައްދަލުވުންތަކުގެ ބޭނުމަކީ ލިބެންހުރި ހިލޭ އެހީގެ ފުރިހަމަ ބޭނުން ހިފުމަށް ދަނޑުވެރިންނަށް ހިތްވަރު ދިނުމެވެ.

އެސްއެމްއީ ޑިޖިޓަލްއިން ބުނިގޮތުގައި މިހާރު ކުރިއަށްދަނީ ހުށަހެޅިފައިވާ އެޕްލިކޭޝަންތައް އިވެލުއޭޓް ކުރުމުގެ މަސައްކަތެވެ. މި މަރުހަލާއަށްފަހު ފައިސާ ދޫކުރުމުގެ ކަންކަން އެ ކުންފުނި މެދުވެރިކޮށް ހަމަޖެހިގެންދާނެ ކަމަށާއި، މި ބުރުގެ މުއްދަތު ހަމަވި ނަމަވެސް، އިސްލާމީ އުސޫލުތަކާ އެއްގޮތަށް ދޫކުރާ "ދަނޑުވެރި ނަފާ" ފައިނޭންސިންއަށް އެދުމުގެ ފުރުސަތު އަދިވެސް އެބައޮތް ކަމަށް އެ ކުންފުނިން ބުނެއެވެ.