ރަސްމާލެ މަޝްރޫއާ ގުޅޭގޮތުން ނަޝީދު މިހެން ވިދާޅުވީ، ރައްޔިތުންގެ ޚިޔާލު ހޯދުމުގެ ވޯޓެއް ނެގުމުގެ ކުރިން އެ މަޝްރޫއުގެ އެއްބަސްވުމުގައި ސޮއިނުކުރުމަށް ގޮވާލައި އެމްޑީޕީގެ ގައުމީ މަޖިލީހަށް ހުށަހެޅި ގަރާރަކަށް ބަހުސްކުރުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ކޮލަމާފުށީ ދާއިރާގެ ރައީސް މަހްފޫޒް ސައީދު ހުށަހެޅުއްވި އެ ގަރާރުގައި ވަނީ، މި މަޝްރޫއާމެދު އާންމުން ދެކޭގޮތް ބެލުމަށް ވޯޓެއް ނެގުމަށާއި ސަރުކާރުން އެފަދަ ވޯޓަކަށް އެއްބަސްނުވެއްޖެ ނަމަ އެ މަޝްރޫއު ހުއްޓުވުމަށް މުޒާހަރާ ކުރުމަށް ގޮވާލާފައެވެ.
ނަމަވެސް ގައުމީ މަޖިލީހުގެ ޖަލްސާގައި ވާހަކަފުޅު ދައްކަވަމުން ނަޝީދު ވަނީ ސަރުކާރުގެ މި ނިންމުމަށް ތާއީދުކުރައްވާކަން ހާމަކުރައްވައި، އެ މަޝްރޫއަށް ފުރިހަމައަށް ތާއީދުކުރައްވާ ކަމަށް ވިދާޅުވެފައެވެ.
މި ގަރާރަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލްގެ އިތުރުން ކުރީގެ ރައީސް ވެސް ތާއީދުކުރައްވައި ވާހަކަދެއްކެވި ނަމަވެސް، ގައުމީ މަޖިލީހުގައި މި ގަރާރާ ދެކޮޅަށް ވާހަކަދެއްކެވި ހަމައެކަނި ބޭފުޅަކީ ރައީސް ނަޝީދެވެ.
ނަޝީދު ވިދާޅުވީ ރާއްޖޭގައި މިވަގުތު ތިބި އެންމެންނަކީ ވެސް ބޭރުން އައިސް ވަޒަންވެރިވެގެން އުފެދިފައިވާ އާބާދީއެއްގެ ދަރިން ކަމަށާއި، މިފަދަ ނިންމުންތަކުން ނުކުންނާނީ ރަނގަޅު ނަތީޖާ ކަމަށެވެ.
މީގެއިތުރުން މީގެ 300 އަހަރު ކުރިން ރާއްޖެ އައި ނައުފަހަރުގެ ތާރީޚީ މިސާލެއް ދައްކަވަމުން ނަޝީދު ވިދާޅުވީ، 100 އަހަރު ވާއިރު ވެގެން ގޮސްދާނެ ގޮތަކާމެދު އެމަނިކުފާނަށް ވިސްނާވަޑައިގެންނެވޭ ކަމަށާއި ސަރުކާރުގެ އެ ނިންމުމަށް ފުރިހަމައަށް ތާއީދުކުރައްވާ ކަމަށެވެ.
