ހުޅުމާލޭ ސެންޓްރަލް ޕާކުގައި މިއަދު ހަވީރު ބޭއްވި ޚާއްޞަ ރަސްމިއްޔާތެއްގައި މި މައުރަޒު ރައީސުލްޖުމްހޫރިއްޔާ އިފްތިތާޙުކޮށްދެއްވި އިރު، އެމަނިކުފާނުގެ އަރިހުގައި އަނބިކަނބަލުން ސާޖިދާ މުޙައްމަދާއި ވަޒީރުންގެ މަޖިލީހުގެ މެންބަރުން އަދި ދަޢުލަތުގެ އެކި މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ވަނީ ޞިއްޙީ ދާއިރާއިން ވޭތުވެދިޔަ ތިން އަހަރު ދުވަހުގެ ތެރޭގައި ކުރެވުނު މުހިންމު މަސައްކަތްތަކާއި ހާސިލުކުރެވުނު ލަނޑުދަނޑިތައް ހިމަނައިގެން ތައްޔާރުކޮށްފައިވާ ”ހަފްތާ 156“ ފޮތްވެސް ރަސްމީކޮށް ނެރެދެއްވާފައެވެ.

އެކްސްޕޯ އިފްތިތާޙުކޮށްދެއްވުމަށްފަހު، ރައީސުލްޖުމްހޫރިއްޔާގެ ދެކަނބަލުން ވަނީ އެކްސްޕޯގައި ހުރި ތަފާތު ސްޓޯލްތަކަށް ޒިޔާރަތްކުރައްވައި، އެ ތަންތަނުން އާންމުންނަށް ފޯރުކޮށްދެމުންދާ ޚިދުމަތްތަކާއި މަޢުލޫމާތުތައް އޮޅުންފިލުއްވާފައެވެ.

”ދުޅަހެޔޮ އުފާވެރި ޖީލަކަށް އެންމެން އެކުގައި“ މި ޝިޢާރުގެ ދަށުން ކުރިއަށްގެންދާ މި މައުރަޒުގައި މާލެއާއި އަތޮޅުތަކުގެ ހޮސްޕިޓަލްތަކާއި، ކްލިނިކްތަކުގެ އިތުރުން ޞިއްޙީ ދާއިރާގައި ހަރަކާތްތެރިވާ 60 އަށްވުރެ ގިނަ މުއައްސަސާއާއި ޖަމުޢިއްޔާތަކުގެ ސްޓޯލްތައް ވަނީ ޤާއިމުކޮށްފައެވެ.

އެކްސްޕޯ ހުޅުވުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ގީލާ އަލީ ވިދާޅުވީ، މުޖުތަމަޢުގައި ގައިންގަޔަށް ނާރާ ބަލިތައް އިތުރުވަމުންދާ މި ދަނޑިވަޅުގައި ކަސްރަތު ކުރުމާއި ރަނގަޅު ކާނާ ބޭނުންކުރުން ފަދަ ހެޔޮ ބަދަލުތައް ދިރިއުޅުމުގެ އާދައަކަށް ހަދަންޖެހިފައިވާ ކަމަށެވެ.

ޞިއްޙަތާ ބެހޭ ވުޒާރާއިން ފާހަގަކުރި ގޮތުގައި، މިދިޔަ އަހަރު ބޭއްވި މިފަދަ އެކްސްޕޯއަށް ދުވާލަކު 10،000 އަށްވުރެ ގިނަ މީހުން ޒިޔާރަތްކޮށްފައިވާއިރު، މި އަހަރުގެ އެކްސްޕޯއަށްވެސް ވީހާވެސް ގިނަ އާންމު ރައްޔިތުން ޒިޔާރަތްކޮށް މަޢުލޫމާތު ހޯދުމަކީ އެ ވުޒާރާގެ ވަރަށް ބޮޑު އެދުމެކެވެ.

ހުރިހާ ޢުމުރުފުރައެއްގެ ފަރާތްތަކަށްވެސް ބައިވެރިވެވޭ ގޮތަށް ހުޅުވާލައިގެން ހުޅުމާލޭ ސެންޓްރަލް ޕާކުގައި ކުރިއަށްގެންދާ މި އެކްސްޕޯ ކުރިއަށްދާނީ ތިން ދުވަހުގެ މުއްދަތަށެވެ.