ރ. އަތޮޅުގެ ވެރިކަން ކުރާ އުނގޫފާރަކީ ރަޖިސްޓަރީވެފައިވާ އާބާދީގައި 1900 މީހުން ހިމެނުނު ނަމަވެސް، ތަޢުލީމާއި ޞިއްޙީ ޚިދުމަތް ހޯދުމަށް އެކި ރަށްރަށުން ޢާއިލާތައް ހިޖުރަކުރުމާ ގުޅިގެން 2500 އަށްވުރެ ގިނަ މީހުން ދިރިއުޅޭ ރަށެކެވެ. އެހެންކަމުން ރައްޔިތުންނަށް ބޭނުންވާ ޚިދުމަތްތައް ފުރިހަމަކޮށްދިނުމަށް ސަރުކާރުން އަރބަން ސެންޓަރުތަކުގެ ގޮތުގައި ތަރައްޤީކުރަން ނިންމެވި މުހިންމު ރަށްތަކުގެ ތެރޭގައި އެރަށް ވަނީ ހިމަނާފައެވެ.

އުނގޫފާރު ރީޖަނަލް ހޮސްޕިޓަލް ޓާޝަރީ ފެންވަރަށް ތަރައްޤީކުރުމުގެ މަޝްރޫޢު ކުރިއަށްދާއިރު، އެތަނުގައި ޖާގަ އިތުރުކުރުމަށް އަޅާ އައު ޢިމާރާތުގެ މަސައްކަތް ބަޔަކާ ހަވާލުކޮށް ސައިޓް މޮބިލައިޒްކުރުމުގެ މަސައްކަތް މިހާރު ވަނީ ފަށާފައެވެ. ދުވާލެއްގެ މައްޗަށް އެވަރެޖްކޮށް 250 އާއި 300 އާ ދެމެދުގެ އަދަދަކަށް މީހުން ޚިދުމަތް ހޯދާ އެ ހޮސްޕިޓަލުން މިހާރުވެސް އެމްއާރްއައި އާއި ހިތުގެ ފަރުވާ އަދި ތެރަޕީގެ އެކި ޚިދުމަތްތައް ދަނީ ލިބެމުންނެވެ.

ތަޢުލީމީ ދާއިރާ ފުޅާކުރުމަށް ސްކޫލަށް 8 ކްލާސްރޫމް އިތުރުކުރުމުގެ މަސައްކަތް ބާރަށް ކުރިއަށްދާއިރު، އިތުރު 8 ކްލާސްރޫމް އެޅުމަށްވެސް ވަނީ ހަމަޖެހިފައެވެ. މީގެއިތުރުން ޒުވާނުންނަށް ފުރުޞަތުތައް ފަހިކޮށްދިނުމުގެ ގޮތުން ސަރަޙައްދީ ފެންވަރުގެ މުބާރާތްތައް ބޭއްވޭ ފީފާ ފެންވަރުގެ ސްޓޭޑިއަމަކާއި ސްޕޯޓްސް ކޮމްޕްލެކްސް އަދި އިތުރު ކުޅިވަރު ވަސީލަތްތައް ތަރައްޤީކުރުމުގެ މަސައްކަތް ދަނީ ހިނގަމުންނެވެ.

ބޯހިޔާވަހިކަމުގެ ދަތިކަން ޙައްލުކުރުމަށް 500 ހައުސިންގ ޔުނިޓް ތަރައްޤީކުރުމަށް ސަރުކާރުން ނިންމަވާފައިވާއިރު، އެ މަޝްރޫޢަށް ބިން ކަނޑައަޅާފައިވަނީ 2024 ވަނަ އަހަރު ހިއްކާފައިވާ 13 ހެކްޓަރުގެ ބިމުންނެވެ. އެ ސަރަޙައްދުގައި ހިލަޖެހުމުގެ މަސައްކަތް މިހާރު ކުރިއަށްދާއިރު، ރަށުގެ ބަނދަރަށް 500 ފޫޓުގެ ޖާގަ އިތުރުކުރުމާއި، ބަނދަރުގައި ފެރީ ޓާމިނަލެއް އެޅުމުގެ މަސައްކަތްވެސް ދަނީ ހިނގަމުންނެވެ.

މީގެއިތުރުން ރަށުގެ ކުނިކޮށީގެ މަސައްކަތް ކުރިއަށް ގެންދިއުމަށް ހަމަޖެހިފައިވާއިރު، ރައްޔިތުންނަށް މާލީ ޚިދުމަތްތައް ފަސޭހަކޮށްދިނުމަށް މޯލްޑިވްސް އިސްލާމިކް ބޭންކުގެ ބްރާންޗަކާއި އޭޓީއެމްގެ ޚިދުމަތް ވަނީ ޤާއިމުކޮށްފައެވެ. އަދި ބޭންކް އޮފް މޯލްޑިވްސްގެ ޑޮލަރު އޭޓީއެމެއް ބަހައްޓައިގެންވެސް މިހާރު ދަނީ ޚިދުމަތް ފޯރުކޮށްދެމުންނެވެ.