"އަހާ" ފޯރަމުގައި އާންމުންގެ މީހަކު ކުރި ސުވާލަކަށް ޖަވާބުދެއްވަމުން މިނިސްޓަރު ޒަރީރު ވިދާޅުވީ، ރޭޓިން މަތިވުމަކީ ދައުލަތުގެ އިގުތިސާދީ މަސައްކަތްތައް ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކަށް ބައިނަލްއަގުވާމީ ފެންވަރުގައި ލިބުނު ބޮޑު ތާއީދެއް ކަމަށެވެ. މީގެ ސަބަބުން އިތުރު މާލީ އެހީތައް ހޯދުމުގެ މަގު ފަހިވެގެން ގޮސްފައިވާ ކަމަށް އެމަނިކުފާނު ފާހަގަކުރެއްވިއެވެ.

މިނިސްޓަރު ފާހަގަކުރެއްވި ގޮތުގައި ރާއްޖޭގެ ރޭޓިން އެންމެ ފުރަތަމަ 2016 ވަނަ އަހަރު ހެދިއިރު ބީ ޕްލަސްގައި ހުރި ނަމަވެސް، އޭގެ ފަހުން އައީ ދަށަށް ދަމުންނެވެ. ނަމަވެސް، މި ސަރުކާރުން ދަރަނިތައް އަދާކުރުމަށާއި މާލީ ކަންކަން ރަނގަޅުކުރުމަށް އަޅަމުންދާ ހަރުދަނާ ފިޔަވަޅުތަކާއެކު މި މަހުގެ އަށްވަނަ ދުވަހު މޫޑީޒްއިން ވަނީ ރާއްޖޭގެ ރޭޓިން ސީއޭއޭ1 އަށް މަތިކޮށްފައެވެ.

"ރޭޓިންގެ އަޕްގްރޭޑިން ލިބުނު ފަހުން ބައްދަލުވި ދުނިޔޭގެ އެކި އެކި މާލީ އިދާރާތަކުން ވަރަށް ޕޮޒިޓިވްކޮށް މި ކަން ފާހަގަކޮށް، ދައުލަތަށް ބޭނުންވާ ފައިނޭންޝަލް ފެސިލިޓީތައް ފޯރުކޮށްދިނުމުގައި ވަރަށް ޕޮޒިޓިވްކޮށް ވިސްނާކަން ފާހަގަކުރެވޭ،" ބޭރުގެ މާލީ އިދާރާތަކުގެ އިތުބާރު ސަރުކާރަށް އޮތް މިންވަރު ހާމަކުރައްވަމުން މިނިސްޓަރު ވިދާޅުވިއެވެ.

ދަރަނި އަދާކުރުމުގައި މި ސަރުކާރުން ހޯދާފައިވާ ބޮޑެތި ކުރިއެރުންތަކަށް އަލިއަޅުއްވާލައްވަމުން ޒަރީރު ވިދާޅުވީ، 2013 އިން 2018 އަށް ދައްކާފައިވަނީ ގާތްގަނޑަކަށް 415 މިލިއަން ޑޮލަރު ކަމަށާއި، 2018 އިން 2023 އަށް ދައްކާފައިވަނީ 948 މިލިއަން ޑޮލަރު ކަމަށެވެ. އެހެންނަމަވެސް މި ސަރުކާރުން މިހާތަނަށް 1.42 ބިލިއަން ޑޮލަރުގެ ދަރަނި އަދާކޮށް، ފިސްކަލް ނިޒާމަށް ވަރުގަދަ އިސްލާހީ ބަދަލުތަކެއް ގެންނަމުންދާ ކަމަށް ވިދާޅުވިއެވެ.

ދައުލަތުގެ ބަޖެޓު ޑެފިސިޓް ކުޑަކުރުމުގެ މަސައްކަތްތަކާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ، މެދުއިރުމަތީގެ ހަނގުރާމައާ ގުޅިގެން ގޮންޖެހުންތައް ކުރިމަތިވި ނަމަވެސް، ޑެފިސިޓް ދިހަ ޕަސެންޓަށްވުރެ ދަށުގައި ހިފެހެއްޓުމަކީ ސަރުކާރުގެ މުހިންމު އަމާޒެއް ކަމަށެވެ.

މީގެއިތުރުން، މި އަހަރުގެ މިހާތަނަށް ހިލޭ އެހީގެ ގޮތުގައި ރާއްޖެއަށް 514.6 މިލިއަން ރުފިޔާ ލިބިފައިވާއިރު، މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު ދެގުނައަށްވުރެ އިތުރު އަދަދެކެވެ.