ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އިން އާންމުކުރި 2025 ވަނަ އަހަރުގެ ކޯޕަރޭޓް ގަވަނަންސް ރިވިއުއިން ދައްކާ ގޮތުގައި އެސްޓީއޯ އިން ވަނީ 97.5 އިންސައްތައިގެ މަތީ ކޮމްޕްލަޔަންސް ރޭޓެއް ހާސިލުކޮށްފައެވެ. މިއީ އެސެސްކުރެވުނު އަށް ކުންފުނީގެ އެވްރެޖް ކަމަށްވާ 92.9 އިންސައްތައަށް ވުރެ ބޮޑު ކުރިއެރުމެކެވެ.

މި ރިވިއު އެކުލަވާލާފައިވަނީ 30 ޖޫން 2026 އާ ހަމައަށް 2025 ވަނަ އަހަރުގެ އަހަރީ ރިޕޯޓާއި އޮޑިޓްކޮށްފައިވާ މާލީ ބަޔާންތައް ހުށަހަޅާފައިވާ ކުންފުނިތަކަށް އަމާޒުކޮށްގެންނެވެ. މުޅި ބާޒާރުގެ ކޮމްޕްލަޔަންސް ރޭޓް ވެސް 2023 ވަނަ އަހަރުގެ 86 އިންސައްތައާއި 2024 ވަނަ އަހަރުގެ 88 އިންސައްތައާ އަޅާބަލާއިރު ވަނީ ކުރިއަރާފައެވެ.

ސީއެމްޑީއޭގެ ރިޕޯޓުގައި ފާހަގަކޮށްފައިވާ ގޮތުގައި އެސްޓީއޯ އިން މި ކާމިޔާބީ ހޯދީ ޑިރެކްޓަރުން ތަމްރީނުކުރުމާއި، އެތެރޭގެ އޮޑިޓް ނިޒާމު ހަރުދަނާކޮށް ހާމަކަން ބޮޑު އުސޫލުތައް ގާއިމުކޮށްގެންނެވެ. އެގޮތުން، 2025 ވަނަ އަހަރު އެ ކުންފުނީގެ ޑިރެކްޓަރުން ވަނީ 1.03 މިލިއަން ރުފިޔާ ހަރަދުކޮށްގެން އަށް ތަމްރީނު ޕްރޮގްރާމެއް ފުރިހަމަކޮށް، އެ މައުލޫމާތުތައް ފުރިހަމައަށް ހާމަކޮށްފައެވެ.

މީގެއިތުރުން، އޮޑިޓްގެ މިނިވަންކަން ކަށަވަރުކުރުމަށްޓަކައި އެސްޓީއޯގެ ޗީފް އޮޑިޓް އެގްޒެކެޓިވް މަސައްކަތުގެ ގޮތުން އޮޑިޓް އެންޑް ރިސްކް ކޮމިޓީގެ ޗެއާޕާސަނަށް އަދި އިދާރީ ގޮތުން ސީއީއޯއަށް ރިޕޯޓްކުރާ ހަރުދަނާ އޮނިގަނޑުވެސް ރިޕޯޓުގައި ފާހަގަކުރިއެވެ. އަދި ބޯޑު އިންތިހާބުގައި ތިންބައިކުޅައެއްބައި ޑިރެކްޓަރުން ކޮންމެ އަހަރަކު އިންތިހާބަށް ހުށަހެޅުމުގެ މިންގަނޑަށް ފުރިހަމައަށް އަމަލުކުރީވެސް ހަމައެކަނި އެސްޓީއޯއިންނެވެ.

ދެމެހެއްޓެނިވި ތަރައްގީއާ ގުޅޭ މައުލޫމާތު ބައިނަލްއަގުވާމީ މިންގަނޑުތަކާ އެއްގޮތަށް ހާމަކުރި ދެ ކުންފުނީގެ ތެރޭގައި ވެސް އެސްޓީއޯ ވަނީ ހިމެނިފައެވެ. މިއީ 2026 ވަނަ އަހަރު ތަންފީޒުކުރަން ފަށާ "މޯލްޑިވްސް ސަސްޓެއިނަބިލިޓީ ރިޕޯޓިން ފްރޭމްވޯކް" އަށް އިސްނަގައިގެން ކުރިއާލާ ތައްޔާރުވުމުގެ ގޮތުން އެޅުނު މުހިންމު ފިޔަވަޅެކެވެ.

މި ރިވިއުގައި އެސްޓީއޯއިން ރަނގަޅުކުރަންޖެހޭ ކަމެއްގެ ގޮތުގައި ފާހަގަކޮށްފައިވަނީ، އޮޑިޓް ކޮމިޓީގައި މާލީ ދާއިރާގެ ތަޖުރިބާކާރު މަދުވެގެން ދެ މެންބަރުން ތިބެންޖެހޭނެ ކަމަށް އޮންނަ ޝަރުތު ފުރިހަމަކުރުމެވެ. ސީއެމްޑީއޭއިން ބުނި ގޮތުގައި މިފަދަ ރިވިއުތަކުގެ މަގްސަދަކީ ކުންފުނިތަކުގެ ހިންގުން ހާމަކަން ބޮޑުކޮށް، އިންވެސްޓަރުންގެ އިތުބާރު ބޮޑުކުރުމެވެ.