"ޗައިނާ ސޯލާ ލައިޓްސް މޯލްޑިވްސް" މަޝްރޫއުގެ ދަށުން މި ތަކެތި ރާއްޖެއާ ހަވާލުކުރުމަށް އަންގާރަ ދުވަހު ބޭއްވި ހާއްސަ ރަސްމިއްޔާތުގައި، ދިވެހި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ބިނާރާއި ގެދޮރުވެރިކަމާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބެވެ. އަދި ޗައިނާ ސަރުކާރުގެ ފަރާތުން ސޮއިކުރެއްވީ އެ ގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާއެވެ.
މި ހަފްލާގައި ވާހަކަދައްކަވަމުން ޗައިނާގެ ސަފީރު ކޮންގް ޝިއަންހުއާ ވިދާޅުވީ، ރާއްޖެއަށް މި މަގުބައްތިތައް ހަދިޔާކުރުމަށް ނިންމަވާފައިވަނީ މިދިޔަ އަހަރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާގެ ރައީސާއެކު ބޭއްވެވި ބައްދަލުވުމުގައެވެ. އަދި ޗައިނާއަކީ އަބަދުވެސް ރާއްޖެއަށް އެހީތެރިކަން ފޯރުކޮށްދޭ ގާތް ގައުމެއްކަން ސަފީރު ފާހަގަކުރެއްވިއެވެ.
ސަފީރު އިތުރަށް ފާހަގަކުރެއްވި ގޮތުގައި، މީގެ ކުރިން ޗައިނާއިން ރާއްޖެއަށް ހަދިޔާކުރި ސޯލާ މަގުބައްތިތައް 3 ރަށެއްގައި ވަނީ ހަރުކޮށްފައެވެ. އަދި މިފަހަރު ހަދިޔާކުރި މަގުބައްތިތަކާއެކު އިތުރު ރަށްރަށުގައި ބައްތިތައް ހަރުކުރެވި، ދިވެހިންގެ ދިރިއުޅުމަށް ހެޔޮ ބަދަލެއް އަންނާނެ ކަމަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުވިއެވެ.
އިރުގެ އަލިން ހަކަތަ އުފައްދާ މި މަގުބައްތިތަކުގެ ސަބަބުން އާންމު ކަރަންޓަށް ބަރޯސާވާ މިންވަރު ކުޑަވެ، ހަކަތައަށް ކުރަންޖެހޭ ހޭދަ ބޮޑުތަނުން ކުޑަވެގެންދާނެއެވެ. މީގެ އިތުރުން ރަށްރަށުގެ މަގުތައް އަލިކުރުމުގެ މަސައްކަތަށް އިތުރު ފުރިހަމަކަމެއް ލިބި، ދެމެހެއްޓެނިވި ތަރައްގީއަށް ބޭނުންވެފައިވާ ރަށްރަށުގެ މުޖުތަމައުތަކަށް ބޮޑެތި ފައިދާތަކެއް މީގެ ސަބަބުން ލިބިގެންދާނެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ މުހިންމު އަމާޒަކީ 2028 ވަނަ އަހަރަށްދާއިރު ރާއްޖޭގައި ބޭނުންކުރާ ހަކަތައިގެ 33 އިންސައްތައަކީ އިއާދަކުރަނިވި ހަކަތައަށް ހެދުމެވެ. މި ލަނޑުދަނޑި ހާސިލުކުރުމަށްޓަކައި ސަރުކާރުން ދަނީ ރާއްޖޭގެ އެކި ސަރަހައްދުތަކުގައި ސާފު ހަކަތައިގެ ގިނަ މަޝްރޫއުތަކެއް ހަލުވިކަމާއެކު ހިންގަމުންނެވެ.
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ހާމަކޮށްފައިވާ ގޮތުގައި، ރާއްޖޭގައި އިއާދަކުރަނިވި ހަކަތަ އުފައްދާ މިންވަރު މިހާރު ވަނީ 116 މެގަވޮޓަށް އިތުރުވެފައެވެ. މިފަދަ މަޝްރޫއުތަކުގެ ސަބަބުން ބޭރުން ތެޔޮ އެތެރެކުރުމަށް ކުރާ ބޮޑު ހޭދަ ކުޑަކުރެވިގެންދާނެއެވެ.
