މި ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުއްވީ ކޮލަމާފުށީ ދާއިރާގެ މެންބަރު އިބްރާހިމް ދީދީއެވެ. މި އިސްލާހުގެ މައިގަނޑު މަގުސަދަކީ ދިވެހިރާއްޖޭގައި ދާއިމީ މަރުކަޒެއް ނެތި އިންބައުންޑް ޓޫރިޒަމް ހިދުމަތް ދޭ ފަރާތްތަކުގެ އަތުން ޓެކްސް ނެގުމަށް ޖީއެސްޓީ ގާނޫނުގައި ހިމެނި މާއްދާތައް އުނިކުރުމެވެ.
ޑެސްޓިނޭޝަން ޕްރިންސިޕަލްގެ ދަށުން ބޭރުގެ އެޖެންޓުންގެ އަތުން ޓެކްސް ނަގަން ފެށުމާ ގުޅިގެން ފަތުރުވެރިކަމުގެ ދާއިރާގެ އިސް ފަރާތްތަކުން ފާޅުކުރި ކަންބޮޑުވުންތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވަގުތުން އިޖާބަދެއްވާފައެވެ. އެގޮތުން، މި ޓެކްސް ނަގަން ފެށިތާ ތިންވަނައަށް ވީ ދުވަހު އެ ނިންމެވުން ބަދަލުކުރައްވަން ނިންމެވިކަން ރައީސުލްޖުމްހޫރިއްޔާ ވަނީ އިއުލާނު ކުރައްވާފައެވެ.
މި ބަދަލު ގެނައުމަށް ނިންމެވީ ރާއްޖެއަށް އެންމެ ގިނައިން ފަތުރުވެރިން އަންނަ ރަޝިޔާ އާއި އިންޑިއާ އަދި ޔޫރަޕްގެ މާކެޓުތަކުގެ ޓުއާ އޮޕަރޭޓަރުންގެ ހުރި ދަތިތަކަށް ރިއާޔަތްކުރުމަށް ފަހުގައެވެ. ފްރާންސްގެ އީޑީވީ އާއި ސެޓޯ އަދި އިޓަލީގެ އެސްޓޯއީ ފަދަ ޖަމިއްޔާތަކުން ވަނީ ފިނި މޫސުމުގެ ސީޒަނަށް ކުރީބައިގައި ޕެކޭޖުތައް ވިއްކާފައިވުމުން ދިމާވާނެ ގޮންޖެހުންތައް މީރާއާ ހިއްސާކޮށްފައެވެ.
ޓޫރިޒަމް މިނިސްޓަރު މުހައްމަދު އަމީން ވެސް ވަނީ ފަތުރުވެރިކަމުގެ ދާއިރާގެ ޝަކުވާތަކަށް ހައްލު ހޯދައިދިނުމުގެ ގޮތުން ޑެސްޓިނޭޝަން ޕްރިންސިޕަލަށް އަވަސް ބަދަލުތަކެއް ގެންނަން ރައީސުލްޖުމްހޫރިއްޔާ ނިންމަވާފައިވާކަން ހާމަކުރައްވާފައެވެ. ސަރުކާރުން މަޖިލީހަށް ފޮނުވި ބިލަކީ އެ ނިންމެވުން ތަންފީޒުކުރުމަށް އެޅުނު މުހިންމު ފިޔަވަޅެކެވެ.
މި ބިލުގައިވާ މާލީ އަންދާޒާތައް ދައްކާގޮތުން، މި ޓެކްސް ނުނަގަން ނިންމުމުން ބޭރުގެ ޕްލެޓްފޯމުތަކާއި އޮޕަރޭޓަރުންގެ އަތުން ލިބޭނެ ކަމަށް ލަފާކުރި 1.6 ބިލިއަން ރުފިޔާގެ އާމްދަނީ ދައުލަތަށް ނުލިބުނު ނަމަވެސް، ސަރުކާރުން އިސްކަންދިނީ ރާއްޖޭގެ މައި އިގުތިސާދީ ދާއިރާގެ ދެމެހެއްޓެނިވި ކުރިއެރުމަށެވެ.
މީގެއިތުރުން، ޓެކުހުން އެއްކިބާވުމަށް ހިންގާ އަމަލުތައް ހުއްޓުވުމަށާއި ގަވާއިދުން ޖީއެސްޓީ ނުދައްކާ ފަރާތްތަކާމެދު ފިޔަވަޅު އެޅުމުގެ ގާނޫނީ ބާރު ކޮމިޝަނަރ ޖެނެރަލް އޮފް ޓެކްސޭޝަނަށް އިތުރަށް ހަރުދަނާކޮށްދިނުމުގެ މާއްދާތައް ވެސް ސަރުކާރުން މި ބިލުގައި ވަނީ ހިމަނާފައެވެ.
