މާބަނޑު މީހުންނަށް ކޮންމެހެން ބޭނުންވާ ފޯލިކް އެސިޑް މާލެއިން ހުސްނުވާ ކަމަށާއި، ކުންފުނީގެ މައި ސްޓޮކުންނާއި ބޭސްފިހާރަތަކުން އެ ބޭސް މެދުނުކެނޑި ލިބެން ހުންނާނެ ކަމުގެ ޔަގީންކަން ސަރުކާރުގެ ބޭސް ކުންފުނި ސްޓޭޓް ފާމާއިން ދީފިއެވެ.

ސްޓޭޓް ފާމާއިން މިކަން ހާމަކުރީ މާލޭގައި ފޯލިކް އެސިޑް ހުސްވެފައިވާ ކަމަށް ބުނެ ސޯޝަލް މީޑިއާގެ އެކި މަންސަތަކުގައި ބައެއް ފަރާތްތަކުން ފަތުރަމުންދިޔަ ދޮގު ވާހަކަތަކާ ގުޅިގެންނެވެ. އެ ކުންފުނިން ވަނީ މުޅި ރާއްޖެއިން ވެސް މި ބޭސް ހުސްނުވާ ކަމަށް ބުނެ ރައްޔިތުންނަށް ފުރިހަމަ ޔަގީންކަން އަރުވާފައެވެ.

ދިވެހި ކޮންމެ ރައްޔިތަކަށް ވެސް ބޭނުންވާ އަސާސީ ބޭސްތައް އެއްވެސް ދަތިކަމެއް ނެތި މެދުނުކެނޑި ފޯރުކޮށްދިނުމުގައި ސްޓޭޓް ފާމާ އަބަދުވެސް ދެމިއޮންނާނެ ކަމަށް އެ ކުންފުނިން ބުންޏެވެ. އަދި ރާއްޖޭގެ ހުރިހާ ސަރަހައްދެއްގައި ހުރި އެ ކުންފުނީގެ ފާމަސީތަކުގެ ސްޓޮކް ދެނެގަނެވޭނެ ނިޒާމެއް މިހާރު ވަނީ އިންތިޒާމު ކުރެވިފައެވެ.

ރައްޔިތުންނަށް ދެމެހެއްޓެނިވި ގޮތެއްގައި ބޭސް ލިބޭނެ މަގު ފަހިކޮށްދިނުމަށްޓަކައި، އަހަރަކަށް ބޭނުންވާ ބޭހުގެ އޯޑަރު ދުރާލާ ޖެހުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ. އެގޮތުން ބޭސް އެތެރެކުރުމަށް މިހާތަނަށް ތިން ކުންފުންޏަކާއެކު އެއްބަސްވުން ގާއިމުކޮށްފައިވާއިރު، އިތުރު ކުންފުނިތަކާއެކު ވެސް މަޝްވަރާތައް ދަނީ ކުރިއަށެވެ.

މީގެއިތުރުން ބޭސް ރައްކާކުރާނެ ޒަމާނީ ސްޓޯރޭޖުތައް ގާއިމުކުރުމާއި، ހޮސްޕިޓަލުތަކުގައި ފާމަސީތައް ހެދުމުގެ މަސައްކަތް ވެސް ބާރަށް ކުރިއަށްދާ ކަމަށް އެ ކުންފުނިން ފާހަގަކުރެއެވެ. މި ފިޔަވަޅުތަކާއެކު، ބޭހުގެ މައްސަލައަށް އެދެވޭ ހެޔޮ ބަދަލެއް އަންނަ އަހަރުގެ މެދުތެރޭގައި ފެންނާނެ ކަމަށް ލަފާކުރެވެއެވެ.

ވިޓަމިން ބީ9 ގެ ބާވަތެއް ކަމަށްވާ ފޯލިކް އެސިޑަކީ މާބަނޑު ދުވަސްވަރު ބަނޑުގައި އޮންނަ ދަރިފުޅުގެ ސިކުނޑިއާއި މައިބަދަ ހެދިބޮޑުވުމަށް ކޮންމެހެން ބޭނުންތެރި މާއްދާއެކެވެ. މާބަނޑު އަންހެނުން ދުވާލަކު 400 މައިކްރޯގްރާމްގެ ފޯލިކް އެސިޑް ބޭނުންކުރުމަށް ސިއްހީ މާހިރުން ލަފާދޭއިރު، މިއީ އައު ސެލްތައް އުފެއްދުމަށް ވެސް އެހީތެރިވެދޭ މުހިންމު ސަޕްލިމެންޓެކެވެ.