ރަސްމާލެއިން ޕްރޮޕަޓީ ވިއްކުމުގައި ސަރުކާރުން އަޅުއްވާ މި ހަރުދަނާ ފިޔަވަޅުތަކުގެ ތަފްސީލު ހާމަކުރައްވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ބޭރުގެ ވަކި އެއް ގައުމެއްގެ ރައްޔިތުންނަށް ޕްރޮޕަޓީ ގަނެވޭނެ އެންމެ މަތީ މިންވަރަކީ 25 ޕަސެންޓް ކަމުގައި ކަނޑައަޅައި ގާނޫނީ އިންތަކެއް ހަމަޖައްސަވާނެ ކަމަށެވެ.

އެމަނިކުފާނު ވިދާޅުވި ގޮތުގައި މި މަޝްރޫއުގެ ދަށުން ބޭރު މީހުންނަށް ތަންތަން ގަތުމުގައި ޚާއްސަ އުސޫލުތަކެއް އެކުލަވާލެވޭއިރު، އިޒްރޭލުގެ ރައްޔިތުންނަށް އެއްވެސް ޕްރޮޕަޓީއެއް ހޯދުމާއި ގަތުން ގާނޫނުން މުޅިން މަނާވާނެއެވެ.

ބޭރު ފަރާތްތަކަށް ހަރުކަށި އުސޫލުތަކެއް ކަނޑައެޅި ނަމަވެސް، މި ތަންތަން ބައްލަވައިގަތުމުގައި ދިވެހި ރައްޔިތުންނަށް އެއްވެސް ހިފެހެއްޓުމެއް އަދި ހުރަހެއް ނޯންނާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައެވެ.

ރަސްމާލެ މަޝްރޫއުން މިހާރުވެސް ޕްރޮޕަޓީ ގަތުމަށް އެންމެ ބޮޑު ޝައުގުވެރިކަމެއް ފާޅުކުރަމުން ދަނީ ގަލްފް ކޯޕަރޭޝަން ކައުންސިލް (ޖީސީސީ) ގެ ގައުމުތައް ނުވަތަ އަރަބި އިސްލާމީ ގައުމުތަކުން ކަމަށްވެސް ރައީސް މުއިއްޒު ފާހަގަކުރެއްވިއެވެ.

މި މަޝްރޫއުގެ ދަށުން ވިއްކުމަށް ހަމަޖެހިފައިވާ ޕްރޮޕަޓީތަކުގެ އަގުތަކާ ގުޅޭގޮތުން ރައީސް ވިދާޅުވީ، 1،000 އަކަފޫޓުގެ ޕްރޮޕަޓީއެއް ވިއްކަނީ ގާތްގަނޑަކަށް 600،000 އެމެރިކާ ޑޮލަރަށް (ގާތްގަނޑަކަށް 9.2 މިލިއަން ދިވެހި ރުފިޔާ) ކަމަށެވެ. އަދި މިއީ ރާއްޖޭގެ މެދުފަންތިއާއި މަތީފަންތީގެ ފަރާތްތަކަށް އަތްފޯރާނެ އަގެއް ކަމަށްވެސް އެމަނިކުފާނު ވިދާޅުވިއެވެ.

ރަސްމާލެ މަޝްރޫއުގެ ފުރިހަމަ ބާރާއި ކޮންޓްރޯލް ދެމިއޮންނާނީ ދިވެހި ސަރުކާރުގެ ބެލުމުގެ ދަށުގައި ކަމަށާއި، މި ބިޔަ މަޝްރޫއު ކުރިއަށްދާނީ ދިވެހި ގައުމީ އައިޑެންޓިޓީއާއި އިޖްތިމާއީ ފޭރާމަށް ފުރިހަމައަށް ރައްކާތެރިކަން ދީގެން ކަމުގެ ޔަގީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ.