ބައިނަލްއަގްވާމީ މައިދާނުގައި މި މުހިންމު މަސައްކަތް ރާއްޖެއިން ހުށަހަޅާފައިވަނީ "މޯލްޑިވްސް ނޭޝަނަލް އެކްސެލެރޭޓަރ: ފްރޮމް އިކޯސިސްޓަމް ޑޭޓާ ޓު ކަންޓްރީ އެކްޝަން" ގެ ނަމުގައި ބޭއްވުނު ހާއްސަ ސެޝަނެއްގައެވެ. މިއީ "ގްލޯބަލް އިކޯސިސްޓަމްސް އެޓްލަސް" ގެ ފުރަތަމަ ގައުމީ އެކްސެލެރޭޓަރގެ ގޮތުގައި ރާއްޖެއިން އިސްނަގައިގެން ކުރިއަށްގެންދިޔަ ތާރީހީ މަސައްކަތެކެވެ.
މި ހަރަކާތުގައި ވާހަކަދައްކަވަމުން އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރްއޭ) ގެ ޑިރެކްޓަރ އޮފް އެންވަޔަރަންމަންޓަލް ކޮމްޕްލަޔަންސް އެންޑް އެސެސްމަންޓް، ރިފްޢަތު ނަޢީމް ވިދާޅުވީ ގައުމީ ފެންވަރުގައި އެއްކުރެވޭ މިފަދަ މައުލޫމާތުތަކުގެ ސަބަބުން ރާއްޖޭގެ ތިމާވެށި ބެލެހެއްޓުމުގެ ނިޒާމު އިތުރަށް ހަރުދަނާވެގެންދާނެ ކަމަށެވެ.
ހަމައެއާއެކު، މި މައުލޫމާތުގެ އަލީގައި ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ތައްޔާރުކުރުމަށާއި، ޖާގަ ބޭނުންކުރުމުގެ ޕްލޭން އެކުލަވާލުމުގެ އިތުރުން ރާއްޖޭގެ ތިމާވެށީގެ ގޮތުން އެންމެ ނާޒުކު ސަރަހައްދުތައް ދެނެގަތުމަށް ބޮޑެތި ފަސޭހަތަކެއް ލިބިގެންދާނެކަން އޭނާ ފާހަގަކުރެއްވިއެވެ.
މި ސެޝަންގައި މިނިސްޓްރީގެ ޑިރެކްޓަރ އޮފް ނޮލެޖް މެނޭޖްމަންޓް، ރިސާޗް އެންޑް އެސެސްމަންޓް، އަޙްމަދު ޝާން ވަނީ މި ޗާޓު އެކުލަވާލުމުގައި ގައުމީ ފެންވަރުގެ މާހިރުން ބައިވެރިވި ގޮތުގެ ތަފްސީލުތައް ހިއްސާކުރައްވާފައެވެ. އަދި އެކި ފަންތީގެ މަޝްވަރާތަކާއި، މައިދާނަށް ނުކުމެ މައުލޫމާތުގެ ސައްހަކަން ކަށަވަރުކުރުމަށް ކުރެވުނު މަސައްކަތްތައް އޭނާ ބަޔާންކޮށްދެއްވިއެވެ.
މީގެއިތުރުން، މި ދިރާސާގައި ރާއްޖޭގެ ލޯކަލް މައުލޫމާތުގެ އިތުރުން ޖައްވީ ސެޓެލައިޓް މެދުވެރިކޮށް ދުނިޔެ ބެލެހެއްޓުމުގެ ނިޒާމާއި، ޒަމާނީ އާޓިފިޝަލް އިންޓެލިޖެންސް (އޭއައި) ޓެކްނޮލޮޖީގެ ބޭނުން ފުޅާ ދާއިރާއެއްގައި ހިފާފައިވާކަން ޝާން ފާހަގަކުރެއްވިއެވެ.
ތިމާވެއްޓާ ގުޅޭ ހަރުދަނާ ސިޔާސަތުތައް އެކަށައެޅުމަށްޓަކައި އެކުލަވާލެވުނު މި ޗާޓަކީ ގައުމީ އަސާސީ މިންގަނޑެއްގެ ގޮތުގައި ހުރިހާ ފަރާތްތަކަށްވެސް ބޭނުންކުރެވޭނެހެން އާންމުކޮށް ހުޅުވާލެވޭނެ ވަސީލަތެކެވެ. އަދި ކުރިއަށް އޮތް ތަނުގައި މި މަސައްކަތް ފުޅާކޮށް، ކަނޑުގެ މާހައުލުތަކާއި މުރަކައިގެ ފަރުތައް މި ޗާޓުގައި ހިމެނުމަކީ ރާއްޖޭގެ މުހިންމު އަމާޒެއްކަން މި ބައްދަލުވުމުގައި ވަނީ ހާމަކޮށްފައެވެ.
