ގެދޮރުވެރިކަމާ ބެހޭ ވުޒާރާއިން ގެޒެޓުގައި ޝާއިއުކުރި އިއުލާނެއްގައި ބަޔާންކޮށްފައިވާ ގޮތުގައި، ވިލުފުށިން ދޫކުރާ މި ޔުނިޓުތަކަށް އެދި ފޯމު ހުށަހެޅި ފަރާތްތަކުން 'ހިޔާވެހި ޕޯޓަލް' އަށް ލޮގިންވުމުން، އެ ފަރާތެއްގެ ފޯމަށް ލިބިފައިވާ ޕޮއިންޓު މިހާރު ސާފުކޮށް ފެންނަން ހުންނާނެއެވެ.

ލިބިފައިވާ ޕޮއިންޓާ މެދު ނުވަތަ އިތުރު މައްސަލައަކާ ގުޅިގެން ޝަކުވާއެއް އޮތްނަމަ ހިޔާވެހި ޕޯޓަލް މެދުވެރިކޮށް ޝަކުވާ ހުށަހެޅުމުގެ ފުރުސަތު ވަނީ ހުޅުވާލާފައެވެ. މިގޮތުން ޝަކުވާ ހުށަހެޅުމަށް ރަސްމީ 10 ދުވަހުގެ މުއްދަތެއް ދީފައިވާއިރު، އެ މުއްދަތު ހަމަވާނީ އަންނަ ނޮވެމްބަރު މަހުގެ 10 ވާ އަންގާރަ ދުވަހުގެ މެންދުރުފަހު 2:00 އަށެވެ.

ހައުސިން މިނިސްޓްރީން ހާމަކުރި ގޮތުގައި ހިޔާވެހި ޕޯޓަލް ފިޔަވައި އެހެން އެއްވެސް ގޮތަކުން ހުށަހަޅާ ޝަކުވާތަކާއި، ކަނޑައެޅިފައިވާ މުއްދަތު ހަމަވުމަށްފަހު ފޮނުވާ ޝަކުވާތައް ބަލައިނުގަންނާނެއެވެ. އަދި ހައުސިން ޔުނިޓުތައް ލިބޭ މީހުންގެ ދާއިމީ ލިސްޓު އިއުލާނުކުރުމަށް ހަމަޖެހިފައިވަނީ މި މަރުހަލާގައި ހުށަހެޅޭ ޝަކުވާތަކަށް ފުރިހަމައަށް ބެލުމަށްފަހުގައެވެ.

އެއްހާހަށްވުރެ ބޮޑު އާބާދީއެއް އޮންނަ ވިލުފުށީގައި ކުރިއަށްގެންދާ މި މަޝްރޫއުގައި ފޯމުތައް ރިވިއުކޮށް ޕޮއިންޓް ދީފައިވަނީ ސަރުކާރުން ކަނޑައެޅި އުސޫލުތަކާ އެއްގޮތަށެވެ. އެ މަސައްކަތް ކުރިއަށް ގެންގޮސްފައިވަނީ ވުޒާރާއާއި ވިލުފުށިން ހޮވާލެވުނު ޓީމެއް ހިމެނޭ ގޮތަށް އެކުލަވާލި ޚާއްސަ ކޮމިޓީއަކުންނެވެ.

ވިލުފުށީގެ މި 100 ހައުސިން ޔުނިޓުގެ ދަށުން ދޫކުރަނީ 2،000 އަކަފޫޓުގެ ބަންޑާރަ ގޯތިތަކުގައި އިމާރާތްކޮށްފައިވާ ތިން ކޮޓަރި، ތިން ފާހާނާ، ސިޓިން ރޫމް އަދި ބަދިގެ ހިމެނޭ ފުރިހަމަ ރޯހައުސްތަކެކެވެ. މިއަހަރުގެ އޭޕްރީލް މަހުގެ ނިޔަލަށް މި ޔުނިޓުތަކަށް އެދި ކުރިމަތިލުމަށް ހުޅުވާލި ފުރުސަތުގައި 200 އަށްވުރެ ގިނަ ފަރާތަކުން ވަނީ ފޯމު ހުށަހަޅާފައެވެ.

ވިލުފުށީގައި ހައުސިން ޔުނިޓް އެޅުމުގެ މަސައްކަތް އެންމެ ފުރަތަމަ 2011 ގައި ނޫމަޑި ކޮންސްޓްރަކްޝަންއާ ހަވާލުކޮށް، އަމަލީ މަސައްކަތް 2014 ގައި ފެށި ނަމަވެސް ކޯޓު މަރުހަލާތަކަކާ ގުޅިގެން ފަސް އަހަރަށް މެދުކެނޑުނެވެ. އެހެންނަމަވެސް 2019 ގައި މަސައްކަތް އަލުން ފަށައި، ފަހުން އަމީން ކޮންސްޓްރަކްޝަނާ ހަވާލުކޮށްގެން މިހާރު ވަނީ މި ހުރިހާ ހައުސިން ޔުނިޓެއްގެ މަސައްކަތް އެއްކޮށް ނިންމާލާފައެވެ.